Geguritan "Pedah Apa"

pedah apa ngundha rasa

miyaki dongeng lan crita lawas

ngengidung tembang kasmaran

nyicir wektu

ngoyak impen wayah turu

pedah apa nggadhang udan salah mangsa

mokal tumurune

pinesthi nglengkarane

kareben wiji mati

sauger netepi pesthi

kareben lemah nela tanpa tuwuh

sauger netepi kodrating dhawuh

luhur-luhuring titah

lamun ikhlas ing sumarah

mulat sarira angrasa wani

legawa narima jantraning wanci

Geguritan "Atiku Dakjaluk Bali"

Separo atiku

Dakwenehake sliramu

Sasi ruwah limang taun kepungkur

Jare kanggo njangkepi atimu

Sing kadhung digawa mlayu

Saiki

Atiku koseleh ngendi

Isis njero jam kang gumantung ing senthong

Apa kependhen pawuhan mburi omahmu?

Tinimbang ora kopen ing regeman

Luwih becik balekna,

Aku ora trima

Yen mung arep disiya siya

Tinimbang ora kopen ing regeman

Luwih becik balekna,

Aku ora trima

Yen mung arep disiya siya

Geguritan "Ing Ngendi Dunungmu"

atiku kesel

nututi megamega ing langit kae

pranyata ora ana kang ko titipi

nggadang atimu

prasasat ngoyak playune angin

dak turut ngalor mlakumu ngidul

dak cegat wetan sliramu ngulon

saben saben mung ngreridhu

wewayanganmu kang sakeplasan

kumlebat ing antarane

that thit lan mendhung ireng

ing ngendi kudu daklari

dunungmu kang sayekti

Geguritan "Aja Nakal Priyaku"

aja nakal priyaku

bun esuk during tuntas

kringet uga during atus

sedheng tapak kuku

isih krasa panas ing pundhak

aja kesusu priyaku

klasa isih gumelar

sabar ngenteni crita endah

ngenani laku kanga arep katuju

dalane pancen lunyu

tilas udan wingi kae

nggrayanga golek cekelan lamun sikilmu krasa gumeter

aja nakal priyaku

entenana aku ing nduwur gumuk

awit awakku wis tanpa daya

rinegem kridhamu kang saya ndadra

Geguritan "Bonbin"

Jembar gumelar, kinemulan suket tinata apik

Warna-warna kewan ana ing bonbin                       

Kewan liar uga kewan jinak

Embun esuk tumetes baka siji

Aweh pepuji marang wong kang ngrumati kewan-kewan iku

Pranyata….

Akeh wong sing padha dolan marang bonbin

Andelengi wena-wernaning kewan

Wong kang rawuh padha playon

Wong kang rawuh padha gegojegan

Wong kang rawuh bisa ngguwang sumpeging

ati bebareng